-->

Kaduhung Bag 4 | Carita Sunda

Bener ceuk papatah kolot " Sing asak-asak ngejo, bisi tutung tambagana | Sing asak asak nempo bisi kaduhung jagana, tah ieu teh papatah sangkan urang hati-hati lamun rek nyieun kaputusan dina naon wae kudu nempo sabab akibat jeung kudu nyawang ka hareup naon anu bakal kajadian lamun urang geus ngieun kaputusan. sabab kaduhung mah datangna tara tiheula. 

Mangga urang lajeungkeun deui carita Nyambungna



KADUHUNG

Bag. 4

Karangan : Lina Herlina


Ningali Dinda anu masih kénéh nyempod dina mobil, Bapana nyampeurkeun laju sup ka jero.

Dibarengan ku rasa kadeudeuh, Bapana mamatahan Dinda.

"Dangukeun, Néng! Awéwé anu geus ngarumah tangga mah jadi tanggung jawab salaki dina sagalana. Hadé goréng kalakuan pamajikan, jadi tanggung jawab salaki. Lain bapa rék ngabéla Jang Sahrul, tapi mémang geus kitu katangtuanana. Bapa jeung Mama, nyaah pisan ka Neng. Bapa moal masrahkeun hirup Néng ka jalma anu teu bener. Kabéh kolot gé pasti sarua bakalan siga kitu. Bapa percaya, Jang Sahrul bisa jadi Imam keur Néng. Imam anu bisa nungtun kahirupan Néng  ka Sawarga!" pok Bapana bari ngusapan buuk Dinda.

Ngadéngé omongan bapana, Dinda kur bisa simpé jeung rambisak. Sanajan haténa teu boga rasa cinta ka Sahrul, tapi Dinda geus ngarasakeun kanyaah Sahrul ka manéhna. Dinda ogé bisa ningali  Sahrul téh jelemana bageur tur bener. Tapi, angger haténa can bisa narima cinta Sahrul.

Bari tungkul, Dinda kaluar dina mobil laju nyampeurkeun indungna anu ngajanteung dina lawang panto.

Sup ka jero imah, Dinda jeung kolotna nepi ka molohok ningali kaayaan imahna anu geus sagala aya.

Sanajan leutik, tapi karasana waas pisan. Haténa ngarasakeun kabagjaan anu nyaliara dina haténa. Barang ngarérét kana poto kawin manéhna anu ngajeplak gedé dina témbok haténa mingkin léah. Harita kénéh, Dinda rék nyobaan méré kasempatan ka Sahrul sangkan haténa bisa narima cinta Sahrul. Dinda percaya, kolotna pasti ngajodokeun Dinda ka jalma anu bener.


Ti saprak cicing di imah anyar, Dinda ngamimitian muka haténa jeung diajar sagalana ka Sahrul. Unggal poé, Dinda dipapatahan ku Sahrul kumaha carana masak, kumaha carana bébérés, jrrd. Saméméh indit digawé, Dinda sok ngahaja nganteur Sahrul nepi ka lawang panto laju nyium leungeunna.

Ampir kana samingguna, Dinda  ngamimitian muka haténa keur Sahrul. Tapi, Dinda masih kénéh can bisa mikeun sagalana ka Sahrul. Salila kawin, Dinda masih kénéh parawan. Tapi, Sahrul masih sabar nungguan kaikhlasan Dinda.

Poé ganti ka Minggu, Minggu ganti ka bulan, Dinda ngarasa kesel cicing waé di imah, Dinda kur bisa ngobrol jeung Rina, babaturanna dina WA. 

Hiji waktu, babaturanna kungsi manggihan Diki di warung anu deukeut jeung imahna. Ku sabab apal caritana baheula, ahirna Ratna nyarita ka Dinda perkara manéhna ningali Diki.

"Din, nuju naon?" tanya Ratna dina WA.

"Biasa wé, gogoléran bari lalajo tipi," témbal Dinda.

"Din, basa kamari, kuring ningali si Diki keur ngopi di warung deukeut imah kuring!" pok Ratna.

"Maenya, Rat?" tanya Dinda panasaran.

"Enya, aslina. Kuring mah teu bohong. Kin nya, dikintunkeun fotona!" pok deui Ratna.

Pung, foto Diki dikirimkeun ka nu WA-na Dinda. Barang muka, panonna molohok jeung ngarasa héran. Ningali waragadna anu béda pisan, teu siga baheula. Kaayaan Diki anu ayeuna mah jadi begang, beungeutna jadi hideung, jeung rada caludih.

"Bener, Diki, nya?" Ratna malik nanya.

"Enya. Ieu mah mémang Diki," témbal Dinda.

"Béda pisan, nya? Teu siga baheula. Ayeuna mah, jadi caludih si Diki téh," pok deui Ratna.

Ningali fotona Diki, Dinda simpé tuluy ngeclakkeun cipanon. Sanajan kur dina poto, tapi haténa ngarasa dibéré jalan, Dinda ngarasa yén manéhna bakal ngajodo deui jeung Diki. Harita kénéh, haténa nepi ka teu inget pisan ka salaki. Nu aya dina pikiranana ngan ukur hayang panggih deui jeung Diki.

Maju ka wanci sareureuh kolot, Dinda ngadon guling gasahan dina kasur. Panonna hésé dipeureumkeun. Pikiranana inget waé ka Diki. Dinda ngarasa panasaran pisan kana kaayaan Diki ayeuna. Tapi, dalah kumaha ogé, manéhna geus boga salaki.

Salaki kuring bakal ngidinan kuring panggih jeung Diki moal, nya? Gerentes haté Dinda.

Ningali Dinda gulinggasahan, haténa panasaran laju nanya lalaunan, "Aya naon, Néng? Jiga nu seueur pikiran pisan!".

"Teu aya nanaon, Aa!" Témbal Dinda bari nonggongan.

"Sok atuh, nyarios, Néng! Sugan Aa tiasa ngabantosan." Pokna deui bari ngolo.

"Pasti Aa moal ngidinan, najan nyarios ogé".

"Ngidinan naon, Néng? Sok atuh kedalkeun heula, kahayang Néng, naon?" 


Can puguh acan nyarita, panonna jol murubutkeun cipanon. Bari nyusutan cipanon, Dinda cengkat laju nangkeup harigu. Sahrul ngadeukeutan, nangkeup, tuluy ngusapan buukna. Sanggeus kitu, Sahrul nanya deui, "Aya naon, Néng? Sok atuh nyarita ka Aa, ulah dihemhem ku sorangan ari aya masalah téh!".

Bari nginghak, Dinda nyaritakeun kahayang manéhna ka Sahrul.

"Wanci pecat sawed, Ratna ningali Diki di warung anu cakeut bumina!"

"Diki? Urut kabogoh Néng, sanés?" tanya Sahrul.

"Muhun."

"Néng palay pendak sareng Diki?" tanya deui Sahrul.

Dinda unggeuk bari nyusutan cipanon.

Ningali paroman Dinda anu kaciri miharep pisan ka Diki. Sahrul teu téga, lamun seug nepi ka teu ngidinan. Sanajan haténa berat, tapi Sahrul kudu bisa nahan rasa timburuna. Dirina kur bisa miharep, mudah-mudahan Dinda bisa muka haté keur manéhna, sanggeus dibéré idin manggihan Diki.

"Mangga waé Néng, pami palay pendak sareng Diki mah!" Pok Sahrul bari mésem.

"Leres, Aa?" tanya Dinda panasaran.

"Leres, Néng! Asal. Néng, uninga batesanana, kedah kumaha," pok deui Sahrul.

"Alhamdulillah, atuh! Néng, pasti émut kana batesanana, Aa." Pokna deui mésem bari tuluy nangkeup Sahrul.

Peuting harita, Dinda asa ditonjok congcot sanggeus dibéré idin. Haténa ngarasa jongjon tuluy saré nepi ka tibra.

.........................

Palawargi sadayana admin bade naros, Aya kitu jalmina samodel Kang Sahrul? jeung naon anu bakal dilakukeun ku dina saterusna? Cag... Carita ieu urang lajeungkeun dina postingan salajeungna.

Kanggo para pengunjung anu nembean  maca supados teu lieur dina alur carita kaduhung mangga tiasa ngawitan macana tina bagian 1

Kaduhung Bag.3                            Kaduhung Bag.1                           Kaduhung Bag.5


Advertisement
Kaduhung Bag 4 | Carita Sunda
Loading...